ភ្នំពេញ៖ នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានណែនាំឱ្យក្រសួងពាណិជ្ជកម្មបន្តស្វែងរកទីផ្សារថ្មីបន្ថែមទៀតសម្រាប់បង្កើនការនាំចេញផលិតផលកម្ពុជាទៅទីផ្សារអន្តរជាតិ។ ទន្ទឹមនេះត្រូវទប់ស្កាត់រាល់ទំនិញហូរចូលខុសច្បាប់ ខូច ឬគ្មានគុណភាព។
សម្តេចធិបតី បានណែនាំឱ្យក្រសួងពាណិជ្ជម្ម និងក្រសួងពាក់ព័ន្ធនានា ត្រូវរួមគ្នាថែរក្សានូវកិច្ចព្រមព្រៀងពាណិជ្ជកម្មរវាងកម្ពុជា និងប្រទេសជាមិត្ត។
សម្តេចធិបតី បានមានប្រសាសន៍ថា រដ្ឋមន្ត្រីក្រសួងដែលអមដំណើរជាមួយសម្តេចទៅបរទេស ត្រូវឆ្លៀតឱកាសជួបជាមួយដៃគូអន្តរជាតិ ដើម្បីទាញលំហូរពាណិជ្ជកម្មនៅកម្ពុជា។
សម្តេចធិបតី ក៏បានណែនាំឱ្យក្រសួងពាណិជ្ជកម្មបន្តជំរុញការផលិត និងប្រើប្រាស់ផលិតផលក្នុងស្រុកឱ្យបានកាន់តែច្រើនថែមទៀត តាមរយៈការដាក់តាំងពិព័រណ៌ផលិតផលក្នុងស្រុក ជាមួយនឹងការផ្សព្វផ្សាយឱ្យបានទូលំទូលាយ ដើម្បីកាត់បន្ថយការនាំចូលផលិតផលពីក្រៅស្រុក។
ជាមួយគ្នានេះសម្តេចធិបតី បានណែនាំឱ្យក្រសួងពាណិជ្ជកម្មត្រូវពង្រឹងធ្វើអភិបាលកិច្ច និងអភិវឌ្ឍវិស័យឯកជន ដោយខិតខំកសាងបទដ្ឋានគតិយុទ្ធ ពាក់ព័ន្ធនឹងការគ្រប់គ្រងសមាគមន៍ពាណិជ្ជកម្ម និងសហគ្រាសឯកជន និងបង្កើនការគ្រប់គ្រងការធ្វើពាណិជ្ជកម្មក្នុងស្រុក និងអន្តរជាតិតាមរយៈការពង្រឹងការកែលម្អ និងដាក់ចេញបន្ថែមទៀតនូវច្បាប់លិខិតបទដ្ឋាន និងក្រមសីលធម៌ទាក់ទងអភិបាលកិច្ចក្រុមហ៊ុន និងសហគ្រាសឯកជន កិច្ចការប្រកួតប្រជែង កិច្ចការពារអ្នកប្រើប្រាស់ និងច្បាប់ស្តីពីម្ហូបអាហារដើម្បីរក្សាសុខភាព និងសុវត្ថិភាព និងសុខាមាលភាពអ្នកប្រើប្រាស់។
សម្តេចបានស្នើបែបនេះនៅក្នុងពិធី «បិទសន្និបាតបូកសរុបលទ្ធផលការងារពាណិជ្ជកម្មឆ្នាំ២០២៣ និងទិសដៅការងារឆ្នាំ២០២៤» នៅទីស្តីការក្រសួងពាណិជ្ជកម្ម នារសៀលថ្ងៃទី២២ ខែធ្នូ ឆ្នាំ២០២៣៕
